Il-Perit David Xuereb Jinħatar Bħala Chairman Tal-Awtorità Għas-Saħħa U S-Sigurtà Fuq Il-Post Tax-Xogħol

 Il-Perit David Xuereb Jinħatar Bħala Chairman Tal-Awtorità Għas-Saħħa U S-Sigurtà Fuq Il-Post Tax-Xogħol

Ġie konfermat li l-Perit David Xuereb se jkun qed jinħatar bħala Chairman tal-Awtorità għas-Saħħa u s-Sigurtà fuq il-Post tax-Xogħol.

Il-Perit Xuereb huwa gradwat mill-Università ta’ Malta u universitajiet fl-Ingilterra, mexxa kumpaniji stabbiliti u kien fdat bi proġetti maġġuri kemm f’Malta kif ukoll f’pajjiżi oħra. Tul is-snin, il-Perit Xuereb kien attiv fl-oqsma tad-disinn sostenibbli u l-industrija l-ħadra. Għallem u kien mitlub jagħti preżentazzjonijiet u diskorsi f’diversi universitajiet u istituzzjonijiet, b’interessi partikolari fuq is-sostenibbiltà, l-ambjent u t-tibdil fil-klima.

Sa Marzu li għadda, il-Perit Xuereb kien jokkupa l-kariga ta’ President tal-Kamra tal-Kummerċ u l-Industrija ta’ Malta, u huwa wkoll Direttur tal-Malta Enterprise u l-Awtorità għall-Bini u l-Kostruzzjoni li twaqqfet riċentement.

Il-Perit Xuereb se jkun qed iservi f’din il-kariga wara li Dr Manuel Mallia, li kien Chairman fl-aħħar snin, kien approvat biex ikun ir-Rappreżentant Għoli ta’ Malta fir-Renju Unit.

Matthew Pullicino

Insegwi b'mod attiv dak kollu li jkun qed jiġri, kemm lokali kif ukoll internazzjonali. Naffaxina ruħi bl-istorja, arti kultura li għandna f'pajjiżna u dak kollu li huwa Malti. Naħdem ħafna qrib għaqdiet volontarji fil-qasam kulturali u l-esperjenza tiegħi f'dan ix-xogħol nieħu pjaċir naqsamha ma' ħaddieħor