Sasha Gatt Tistabbilixxi Rekord Nazzjonali Ġdid Fil-Finali Tal-Kampjonati Ewropej Junior
Il-kontinġent ta’ Malta fil-Kampjonati Ewropej tal-Juniors f’Ruma ta wieħed mill-aħjar riżultati li Malta qatt irreġistrat fl-aħħar snin.
Thomas Woods stabbilixxa żewġ Rekords ġodda tal-Age Group fl-avvenimenti ta’ 200m freestyle u 800m freestyle. Fil-200m freestyle huwa għamel ħin ta 1:57.92 filwaqt li fit-800m freestyle il-ħin tiegħu kien ta’ 8:45.99.
L-istorja nkitbet għal Malta meta Sasha Gatt mhux biss kisret ir-rekord tagħha stess ta’ 1500m bi 3 sekondi fil-heats ta’ kwalifikazzjoni iżda waslet ukoll għall-finali tal-istess distanza fis-seba post. Il-prestazzjoni tagħha fil-finali ratha ttejjeb ir-rekord, bi kważi 13-il sekonda oħra fuq il-ħin li kienet stabbiliet il-ġurnata ta ’qabel. Ir-Rekord Nazzjonali l-ġdid tal-1500m issa hu ta’ 16:38.75.
Il-ħinijiet maqsuma ta’Gatt fissru li hija stabbiliet ukoll Rekord Nazzjonali fid-800m freestyle kif ukoll rekords tal-Age Group D kemm fid-distanzi ta’ 800 m kif ukoll ta ’1500m.
Wara l-parteċipazzjoni tagħha fil-Kampjonati Ewropej tal-Junior, Gatt se tkun qed tiffoka fuq il-parteċipazzjoni tagħha fil-Logħob Olimpiku, Tokyo 2020, fejn se tkun l-iżgħar atleta tal-kontinġent. Gatt se tkun qed tikkompeti fl-avvenimenti tal-freestyle. Hi tibda bil-heats ta’ 400m nhar il-Ħadd 25 ta’ Lulju u l-1500m heats nhar it-Tnejn 26 ta’ Lulju.
Ritratt: ASA
